تله سیک دایانیر سون دوراقیندا

گوزومدن آخان یاش آجیلاندیریر

او شیرین گولوشو بال دوداقیندا

یاندیریر بیر نفرت سئوگی باغینی

قیزیشیر پاییزین سویوق نفسی

گویلردن اود یاغیر یئر آلاو چکیر

یانیر آیریلیقدا سئویرم سسی

بیر یولا گئدیریک ایستر ایسته مز

یخیلیر آردیمجا کورپولریمیز

گویدن گلمه یه جک قوچ بیزیم اوچون

ناحاق قان توکه جک دیرخنجریمیز

بیلیرم تبریزین پوزقون باغیندا

هئچ گول وئرمه یه جک سنین عطرینی

یاشام کتابیندا قوجامان تانری

بیرده یازمایاجاق سئوگی سطرینی

کابوس دا گورموشدوم وداع مارشینی

بیزیم سئوگیمیزه پاییز چالاجاق

اسه جک باغیما نفرت یئللری

سئودیگیم گول ده بیر گون سولاجاق

بورویوب ایرانی بورویوب منی

سنه غریب دئسه م لال اولسون دیلیم

گوزومو آچاندان تانیرام سنی

هله ده شاعرلر شعریلرینین

دادی دوزی آقا سنین یادیندیر

بیلمیرم آدیندا نه واردیر آنجاق

کلمه یه جان وئره ن سنین آدین دیر

هله ده آدینی دوتاندا سنین

اؤلار ماراخلانیر چولده چمنده

اؤچونون دیزلری تیتره ییر یئنه

الین آپاراندا اوخا کمنده

میوه لر اوتانیر گه له نده آدین

توکولور توپراقا گوللر تاجلاری

هله قالاجاقلار قیامته جن

باشلاری آشاقا مؤو آغاجلاری

حرمین بهشتین بیر گوشه سی دیر

مغناطیس تک چکیر انس و جن لری

کولگه نده یئر تاپیب دالدالانیبلار

دونانین آوارا گوورچین لری

*****

آنام نذر ائتمیشدی وار یوخون سنه

بیر اوغول ایسته ردی امام رضا!

سنین عشقیندن دیر منیم آدیمی

آتام آنام قویوب غلام رضا

هایانداسان؟

کولدن یانیب دولوبدو اوجاقلار هایانداسان؟

یوخ بیر گولوش سولوبدو دوداقلار هایانداسان؟

هر ایل عزیزله دیک آقاجان شعبان اون بئشین

سسلیرله پوفله شمعی اوشاقلار هایانداسان؟

هر جومعه گلمیشیک گله سن جمکران یولون

چالدی قابار یولوندا ایاقلار هایانداسان؟

سسلیر " نبی " دوزه نمیریک آنجاق اوزاقلیقا

گلسن گلر دوباره قاچاقلار هایانداسان؟

بیزده دوزه نمیریک داها آرتیق فراقینا

سیللی له آل قالیبدی یاناقلار هایانداسان؟

*****

زرتشت یاندیران آلاوین ایستیسی گئدیب

کولدن یانیب دولوبدو اوجاقلار هایانداسان؟

آیریلیق چاغیندا گولور گؤزلرین

بیلیرسن قورتولور یاخان الیمدن

ایندی کی گئدیرسن سؤزوم یوخدو گئت

آللاها تاپشیردیم چیخماز دیلیمدن

آیریلیق چاغیندا اللرین دئییر

داها سالماگینان قولون قولوما

سنله منیم سویوم گئتمیر بیر آرخا

سن گئت اؤز یولونا من اؤز یولوما

من ازل گؤروشده بونو دوشوندوم

اللرین الیمده قالمایاجاقدیر

گوزلرین دئدیلر سنده اولان عشق

کولگه سین باشیما سالمایاجاقدیر

دئییردین سنله من تای توش دئییلیک

اؤزونده بیلیردین چوخودوم سنه

دیلین توتولموشدو سؤز تاپانمادین

نصرتین شعرینی اوخودوم سنه

" گئتمک ایسته ییرسن نه دانیش نه دین

یوخ اول اوزاقلار تک دوماندا چن ده

نه ییمی سئومیشدین دئیه بیلمه دین

ایندیسه یوز عاییب گورورسن من ده"

پاییز آخشام ایدی چنلی بیر یولو

سن گئدیردین منی قَهَر بوغوردو

منیم اؤلموش عشقیم سنین هوسین

اوره گینده آیری سئوگی دوغوردو

 بیلمیرم بو قوشلار نه دئییر منه

آنجاق بیلیرم کی اوچوب گئدیبسن

من بیر دوشرگه یدیم سنین یولوندا

بیر گون قوناغیدین کؤچوب گئدیبسن

من دردیمی دئدیم کؤچن قوشلارا

اونلار بو سؤزلری سنه یئتیرسین

هله ده قاییدسان گؤزوم اوسته سن

بلکه سونکو بارا بره بیتیرسین

 *****

آما منیم چارام آغلاماق دئییل

ایندی آییلمیشام تاپارام سنی

آی منیم هجریم قوچاق نبی تک

ائللر آراسیندا قاپارام سنی

خان چوبان دئییلم دوشم چؤللره

قویمارام کؤهنه لده زامان یارامی

آند اولسون آنامدان امدیگیم سوته

آلارام سئللردن بیر گون سارامی